| 今日睇睇下人地xange突然興起
所以Sign In左個xange diary
講真...見你地個個都用xange
我周不時都想申請番個
不過我又驚煩...嘻~~
今日申請左個！要開始好好咁對佢啦
就先打今日既日記啦>3<
今日係放完假番學既第二日
因為呢排轉左戴con...隻眼乾乾地...
都仲未慣...上堂又唔可以訓教
爆辛苦呀-3-
Miss粉仲要請多一個月病假...
今日有兩堂CHIN一堂PTH
全部都係代課Miss/ Sir黎代堂
唉....上堂無野做又無得訓既感覺好悽慘
Lunch同yau、兒姐同3E班既一個女仔一齊食
比呀妹放飛機飛起左~
好彩最後都搵到人陪我食
傾傾下發現左果個3E班既女仔都有跳ballet
我3歲開始跳，佢4歲...
不過佢竟然高grade過我啊~~
佢grade8而我grade7
嗚...因為佢無跳grade1同2
而我就全部跳晒....發覺自己好晒時間添><
放學後同兒姐去左買Bonnie既生日禮物
發覺自己真係個大白痴
Bonnie既生日過左都唔知！=3=
唯有同兒姐一齊去買禮物啦
行左新之城、綠楊同千色店
越行隻眼越乾...可能d商場大冷氣掛？！
想搵獅子王既野送比Bonnie....不過搵唔到....
連TrendyLand都無囉-0-|||
最後尾都係打算買bear公仔比Bonnie...
等我呢幾日出旺角買bear先
兒姐買左個玩具比Bonnie..
吹泡泡黎架~Bonnie應該會好鍾意的^^
行去地鐵站既時候
係途中比一個女人截停左
地點係 ( 唔知點形容 ) ....
有壽司店既...有樓上三聯，和民同大家樂 ( 定大快活？！)果度囉
佢叫我幫佢買兩本野...一本2蚊、另一本就3蚊
仲有隻原子筆$1.5....
佢話買左之後睇完就可以增加中文作文既水平同埋口才喎
見到佢衣衫"藍"褸、半頭白髮....
又咁Hard Sell我....一輪嘴講左10分鐘野
真係唔捨得唔同佢買
最後我付出左3蚊買左本野
佢話本身要幫佢買隻筆先會送多本佛經比同學仔
不過見同我有緣....就送左本"觀音訓文"比我
哈-0-真係多謝晒喎....
佢話佢本野好多學生幫佢買完之後都話好
番黎幫佢買多幾本喎......
唉....聽到爆無奈.......
佢千方百計留住我....不過我真係唔想再同佢糾纏落去
最後我就話我趕時間....雞咁腳走左
之後我就同兒姐行番去地鐵站度啦
兒姐係咁話我比人呃左....
嗚....我唔係比人呃，係我自己善良，自願比佢呃既
鬼唔知佢本野廢咩
搭地鐵果陣睇左兩眼...發現佢既中文水平奇底
因為好驚自己睇完會影響自己本身既中文水文
最後係步出長沙灣地鐵站既時候路經垃圾桶....
掉左呢兩本野....比人呃既事都告一段落
番到屋企同屋企人分享左呢段奇人奇事後....
爸爸話：好彩係3蚊姐，咪當比佢買個麵包囉！
講真，真係好彩係3蚊咋....
諗下諗下...個女人真係好似有精神病果d咁
講野九唔搭八....本野又九唔搭八
佢話佢會繼續係果度賣野架喎
以後大家路經果度要小心d啦 |
| |
